Feminismo ankaŭ helpas virojn

Feminismo ne estas la plej populara temo, ĉefe inter viroj. Multaj opinias ke ĝi estas ideologio nur por virinoj kaj ne profitas virojn. Iuj tre malŝatas aŭ eĉ malamas ĝin kaj opinias ke ĝi estas kontraŭvirismo kiu celas helpi virinojn per la malhelpado de viroj. Oni diras ke feministoj malamas virojn kaj opinias ke ili estas malbonuloj kiuj kaŭzas ĉiujn problemojn en la mondo. Oni ofte opinias ke unu genro nur profitas se la alia malprofitas.

Sed feminismo plibonigas socion kaj la vivojn de ĉiuj. Certe virinoj pli profitos, sed indas diskuti kiel ankaŭ viroj profitas, principe ĉar viroj tute ne scias. Esence, feminismo temas pri egaleco sen genraj bariloj. Ĉiuj estu liberaj agi iel ajn laŭvole sen timo de genraj stereotipoj. Estas fortaj bariloj kontraŭ virinoj, sed homoj ne scias ke ankaŭ estas bailoj kontraŭ viroj. Kiam mi estis infano mi sciis ke ekzistis multaj neoficialaj reguloj pri kiel knabo devas agi kaj kiuj regis niajn vivojn. Viroj ne portu rozkolorajn ĉemizojn, ne dancu, aŭskultu inan muzikon aŭ rigardu televidprogramojn kiuj estis por virinoj (estis tute klare kiuj programoj estis por viroj kaj kiuj por virinoj). Eĉ havi amikinojn estis iel malvireca.

Anstataŭe, estis kelkaj devigitaj aferoj, eĉ se oni ne vere volis fari ilin. Viroj devu sportumi, devu esti fortaj, devu batali. Drinki estas vireca, do ju pli on drinki des pli vireca oni estas. Mi ofte vidis virojn batali senkiale simple ĉar viroj devas batali. Se oni ne agis tiel, oni estis mokita, priridita kaj ĉikanita. Se oni ne sekvis la regulojn, tio signfis ke oni estis ne vera viro, sed fakte virino aŭ samseksemulo (oni konsideris la du la saman aferon).

La plej stranga afero estis ke la reguloj venis de ni mem, ni konstruis nian propran malliberulejon. Virinoj malpli emis sekvi la regulojn kaj ne juĝis se oni portis rozkoloran ĉemizon. Se oni faris tion, la turmento venis de viroj. La damaĝo venis el kaj al viroj.

Unu el la plej grandaj bariloj temas pri emocio. Viroj ne rajtas montri emocion, krom kolero. Oni rajtas koleriĝi, tiu estas normala vireca afero. Sed neniu viroj rajtas plori, tiu nur estas por virinoj kaj infanoj. Eĉ paroli pri amikeco estas iom malvireca kaj preferinde nediskuita. Mi havas amikojn kiujn mi konas dum jaroj, kaj ni neniam komplimentis unu la alian. Al viroj oni ne komplimentas aŭ diras afablaĵojn. Eĉ por gravaj rilatoj kun familianoj, amikoj kaj amrilatoj, viroj luktas esprimi siajn emociojn. Estas pli akceptebla por viroj traktas siajn problemojn per ebriĝo ol per parolado pri emocioj.

La sola akceptebla emocio al virinoj estas volupto, kvazaŭ ni zorgas nur pri tio. Zorgi pri la sentoj kaj pensoj de virinoj signifas ke vi estas sub ili. Veraj viroj seksumas virinojn, nur stultuloj havas konversaciojn. Pro tio, multaj viroj ne kapablas akcepti la rifuzon de virinoj. Mi multfoje vidis virojn kiuj iĝis amaraj kaj koleraj ĉar belulinoj rifuzis seksumi. Ili ne povis bone esprimi siajn emociojn aŭ montri malfortecon, do ili kulpigis la virinojn.

Estas iuj okupoj kiuj ne taŭgas por viroj (laŭ la reguloj). Viroj ne rajtas esti hartondistoj, dancistoj, flegistoj ktp. Fakte iu laboro rilate al zorgantoj por homoj ne estas vireca laboro, kvazaŭ viroj ne kapablas zorgi. Anstataŭ ili devas labori en konstruado kaj la armeo, tiuj estas virecaj laboroj ĉar ili rilatas al fizika forto.

Iuj viroj estas kontraŭfeministoj ĉar ili opinias ke viroj suferas diskriminacion. Ekzemple, viroj havas danĝerajn laborojn, altajn sinmortigajn nivelojn kaj malpli emas ricevi rajtojn al infanoj kaze de maledziĝo. Ili suferas suspekton pro seksperforto kaj homoj ofte ridas pri seksperforto kontraŭ viroj. Sed tiuj ekzemploj montras kiel feminismo helpas virojn. Ĉi tiuj problemoj okazas pro stereotipoj pri viroj kaj virinoj, do se ni forigos tradiciajn opiniojn pri genro, ĝi helpos virinojn kaj virojn. La plej bona maniero por malpliigi memmortojn estas se viroj povas facile esperimi siajn emociojn. Se ni forigos stereotipojn pri viroj kaj perforto, tiu helpos la virajn viktomojn de perforto. Virinoj ricevas la infanojn pro la steretipo ke virinoj plej bonas je la zorgo de infanoj.

Sed feministoj malamas virojn, ĉu ne? Ĉu ili ne estas plendemaj, tro sensitivaj kaj ofendiĝas pro nenio? Ili kriaĉas kaj silentigas virojn, ĉu ne? Tiuj ja estas la stereotipoj, sed ekzistas stereotipoj pri ĉiuj ideologioj. Oni diras ke dekstristoj malamas malriĉulojn kaj maldekstristoj volas ŝteli vian monon. Probable ie ajn ekzistas iu pri kiu tiu pravas, sed plejparto de homoj estas normalaj. Estas malĝusta ŝajnigi ke ĉiuj kiuj havas malsaman opinion estas malamemaj fiuloj.

Dum longe, mi opiniis ke feminismo estis ideologio kiu ofertis nenion al mi aŭ eĉ atakis min ĉar mi estas viro. Sed nun mi vidas ke ĝi fakte helpas virojn.